西布朗死火博昆士柏流浪

　　西布朗死火博昆士柏流浪英格蘭足總盃第3圈重賽，今非昔比嘅西布朗撐唔過！佢哋已經4場未贏過之餘，近排亦衰到傷兵滿營，就連上次對碰時打開紀錄嘅射手沙恩朗都傷埋，今晚對住近況有明顯起色嘅昆士柏流浪憑乜讓波？梗係揀1.95倍「讓客」！

　　繼穆林保離隊為剛果民主共和國備戰非國盃，喺上次對碰受傷退下火線嘅謝拉，亦證實膝傷嚴重要提早收咧，最慘係連次席射手沙恩朗都打柴，上輪英超佢連後備都冇，今場亦未有消息復出。西布朗係就係仲有「小魔獸」盧卡古壓陣，不過呢位車士借將喺盃賽就啞晒火，至今顆粒無收，火力弱雞成咁，今晚叫人點信？

　　目前昆士柏流浪雖然仲係排喺聯賽榜包尾，但係佢哋繼作客爆冷擊敗車士後，剛戰主場亦成功守和熱刺，就睇得出夏利列納開始摸熟班波，相信整體士氣隨住呢兩場波亦提升唔少，上次交手咁難得喺最後1分鐘逼和西布朗攞到重賽機會，就算要作客都肯定搏盡。

　　英格蘭足總盃賽制：今輪為第3圈重賽，以一場過分勝負，若法定時間內打成平手，需加時作賽，再和就互射12碼決勝。