史隆卡唔理形勢場場搏

　　真係唔知話漢諾威教頭史隆卡係傻仔好定可愛好，佢哋三日前歐霸盃作客西班牙南部對利雲特，賽前雙方都已經提早出線，但係佢哋喺呢場例行事並冇揸流攤，用最強陣容由頭搏到尾，最終喺一度兩球領先下被追和，保住和局最終取得首名出線，不過經過呢場遠征硬仗，球員搏足90分鐘未必回到氣，事實上漢諾威本身兵源相當有限，但史隆卡仲堅持無論任何比賽，每場都用盡全力拚搏，雖然體育精神可嘉，但難免會蝕底，中場大將史甸度仲要帶傷歸來，今晚唔可以上陣，加上中堅夏基停賽，陣容不整。漢諾威係上季德甲唯一主場不敗之師，不過今季因為比賽太密，已經先後輸過畀慕遜加柏同弗賴堡，足見佢哋主場威力亦已經大打折扣。

　　利華古遜三日前歐霸盃一樣係未開波前已提早出線，佢哋當然唔會好似漢諾威咁傻仔，收起晒球隊所有主力，基本只用二隊同青年軍敷衍了事，最終以一球小勝洛辛堡，而且場波喺主場踢，仲免去舟車勞頓之苦，今場蓄銳出擊當然着數晒。事實上利華今季無論攻守表現都十分平穩，已經定位咗係德甲拜仁慕尼黑同多蒙特兩強之外嘅第三勢力，今仗小讓平半值得捧場。

　　德甲尾場漢諾威主場鬥利華古遜，兩軍啱啱喺上周中踢完歐霸盃，漢諾威喺賽前已篤定出線嘅情況下照排強陣搏到盡，事隔三日好難回氣，今場明益蓄銳嘅利華古遜，客軍讓平半都要捧上盤。