維拉冇中場核心難扭頹勢

　　阿仙奴真係多得諾域治唔少，上個禮拜畀「金絲雀」打沉後，跟手喺歐聯又輸埋，所以千祈咪睇輕呢隻雀仔嘅威力，上力後勇往直前，今晚英超打頭陣作客維拉，主隊有得震冇得瞓！

　　上季福大命大唔使降班嘅維拉，諗住呢季重新嚟過，點知英超踢咗8輪仲擺脫唔到上季頹勢，全新改造變成原地踏步，佢哋埋怨季初傷病問題嚴重，令到球隊仲處於磨合期，其實問題係出喺缺乏中場指揮官，只係得番單調嘅長傳急攻，所以踢到依似足散兵游勇。

　　當然，諾域治都唔強得過維拉幾多，之不過整體性就機動好多。「金絲雀」上仗終打開今季勝利之門，主場逼到阿仙奴氣咳，依士氣高昂，只要集中兵力壓縮防守空間，加上高空轟炸打法，維拉主場告急！