拖連奴識撈獲利回吐

　　望吓個意甲積分表，留意表下面嗰行，見到啲咩呀？大大隻字寫住：「森多利亞、拖連奴被扣1分，阿特蘭大被扣2分，錫耶納被扣6分」，記性唔差嘅朋友都應該知道，呢幾隊波上年被揭發喺09至10年意甲及意乙聯賽涉嫌造假波罪成，本來仲有隊拿玻里，不過上訴得直攞番兩分。

　　意大利呢個國度，除咗啲時裝同跑車係真，啲波真係假到唔恨，三五七年就爆一單假波案，由意甲去到意丙都有，唔計畀人查到嘅，每季季中至季尾就有好多默契和波，其中拖連奴真係和波專嚟，呢波就真係鍾意和氣「生財」，真係「生財」有道。

　　今日有場拖連奴主場對阿特蘭大，嘩！睇到個match up就知蠱惑成分幾咁重啦，呢兩隊波都有份被扣分，今年齊齊被罰，咁呢場又點玩好呢？今季拖連奴繼續瘋狂和波，廿四戰六勝十一和七負，今場主W低過2倍，亞洲盤就讓半球，如果捉心理就肯定以為拖連奴贏得，但拖連奴排十二位，阿特蘭大排十四，和波對兩隊都無壞，認為便宜莫貪嘞！

　　畀多兩個數據大參考吓，第一，兩隊波如果球季兩循環都和波，累積只得兩分，如果首次循環各贏一場呢？每隊攞三分咪仲着數，今季首循環拖連奴作客就贏阿特蘭大五比一。第二樣嘢，五年前拖連奴未降落意乙，仲喺意甲對住利禾奴，情況同依相同，又係中下游對碰，又係拖連奴主場讓波，結果利禾奴作客贏二比一喎。至於今場應該點樣投，大自己揸主意啦！